Office of the Deputy Commissioner, Lunglei District, Government of Mizoram, India

O R D E R

Tunlai hian kan ṭhenawm state Manipur-ah Ui a hri(Rabies) a leng mek a, mi tam takin he hri hi kai tawhin thihpui an awm nual tawh a ni. Hemi anih avang hian he hri lak aṭanga kan ui vulhte leh mipuite kan him tlan zawk nan thupek chhuah a tul nia hriat a ni a.

Chuvangin, kei, NAVNEET MANN, IAS, District Magistrate, Lunglei District hian Section 163, Bharatiya Nagarik Suraksha Sanhita (BNSS), 2023-in thuneihna min pek angin Lunglei District mipuite zawm turin a hnuaia thupek hi ka chhuah e.

Ui vulhtu zawng zawng ten an ui vulhte Ui a hri danna (Anti Rabies Vaccine) an pe vek tur a ni.

2. Lunglei District chhungah ram dang emaw state dang aṭangin ui leh a sa lakluh khap tlat a ni.

3. A vulhtu tel lovin khawlaiah zalen takin tumahin ui an vah chhuah tir mai mai tur a ni lova, khawlaiah ui an vahchhuah pui pawhin hrui (leash/chain) hmanga kaih ngei ngei tur a ni. Tin, an zun leh ek khawlaiah an hnutchhiah mai mai tur a ni lo.

4. Ui dam lo emaw Ui a hri (Rabies) natna vei nia rinhlelh te chu rang takin District Veterinary Hospital emaw Veterinary Dispensary emaw Rural Animal Health Center (RAH Centre) pan pui vat tur a ni.

5. Ui-in mi a seh anih chuan a sehtu ui chu Ui a hri danna (Anti Rabies Vaccine) la tawh anih pawhin a rang thei berin damdawiin panpui vat tur a ni.

6. Ui-in mi a seh emaw mihring nunna atana hlauhawm khawpa a awm anih chuan Section 291, Bharatiya Nyaya Sanhita (BNS), 2023-in a tarlan angin ui vulhtu chu thla ruk (6) thleng lung in tan emaw Rs 5000/- thleng chawi tir emaw a kawpin hremna hi pek theih a ni.

He thupek hian thu leh awm hma chu chhuah anih aṭanga thla (2) chhung a huam ang a, thupek zawm lo te chu Section 223, Bharatiya Nyaya Sanhita (BNS), 2023 hmangin hrem theih an ni.

He thupek hi vawiin April ni 17, 2025 hian District Magistrate seal-a nemnghetin ka hming ka ziah hnan e.